5. Upālivaggo

‘‘Khīṇāsavasahassehi, parivuto lokanāyako;

Vivekamanuyutto so, gacchate paṭisallituṃ.

‘‘Ajinena nivatthohaṃ, tidaṇḍaparidhārako;

Bhikkhusaṅghaparibyūḷhaṃ, addasaṃ lokanāyakaṃ.

‘‘Ekaṃsaṃ ajinaṃ katvā, sire katvāna añjaliṃ;

Sambuddhaṃ abhivādetvā, santhaviṃ lokanāyakaṃ.

‘‘Yathāṇḍajā ca saṃsedā, opapātī jalābujā;

Kākādipakkhino sabbe, antalikkhacarā sadā.

‘‘Ye keci pāṇabhūtatthi, saññino vā asaññino;

Sabbe te tava ñāṇamhi, anto honti samogadhā.

‘‘Gandhā ca pabbateyyā ye, himavantanaguttame;

Sabbe te tava sīlamhi, kalāyapi na yujjare.

‘‘Mohandhakārapakkhando, ayaṃ loko sadevako;

Tava ñāṇamhi jotante, andhakārā vidhaṃsitā.

‘‘Yathā atthaṅgate sūriye, honti sattā tamogatā;

Evaṃ buddhe anuppanne, hoti loko tamogato.

‘‘Yathodayanto ādicco, vinodeti tamaṃ sadā;

Tatheva tvaṃ buddhaseṭṭha, viddhaṃsesi tamaṃ sadā.

‘‘Padhānapahitattosi, buddho loke sadevake;

Tava kammābhiraddhena, tosesi janataṃ bahuṃ.

‘‘Taṃ sabbaṃ anumoditvā, padumuttaro mahāmuni;

Nabhaṃ abbhuggamī dhīro, haṃsarājāva ambare.

‘‘Abbhuggantvāna sambuddho, mahesi padumuttaro;

Antalikkhe ṭhito satthā, imā gāthā abhāsatha.

‘‘Yenidaṃ thavitaṃ ñāṇaṃ, opammehi samāyutaṃ;

Tamahaṃ kittayissāmi, suṇātha mama bhāsato.

‘‘‘Aṭṭhārasañca khattuṃ so, devarājā bhavissati;

Pathabyā rajjaṃ tisataṃ, vasudhaṃ āvasissati.

‘‘‘Pañcavīsatikkhattuñca, cakkavattī bhavissati;

Padesarajjaṃ vipulaṃ, gaṇanāto asaṅkhiyaṃ.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

‘‘‘Tusitā hi cavitvāna, sukkamūlena codito;

Hīnova jātiyā santo, upāli nāma hessati.

‘‘‘So pacchā pabbajitvāna, virājetvāna pāpakaṃ;

Sabbāsave pariññāya, nibbāyissatināsavo.

‘‘‘Tuṭṭho ca gotamo buddho, sakyaputto mahāyaso;

Vinayādhigataṃ tassa, etadagge ṭhapessati’.

‘‘Saddhāyāhaṃ pabbajito, katakicco anāsavo;

Sabbāsave pariññāya, viharāmi anāsavo.

‘‘Bhagavā cānukampī maṃ, vinayehaṃ visārado;

Sakakammābhiraddho ca, viharāmi anāsavo.

‘‘Saṃvuto pātimokkhamhi, indriyesu ca pañcasu;

Dhāremi vinayaṃ sabbaṃ, kevalaṃ ratanākaraṃ .

‘‘Mamañca guṇamaññāya, satthā loke anuttaro;

Bhikkhusaṅghe nisīditvā, etadagge ṭhapesi maṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā upālithero imā gāthāyo abhāsitthāti.

‘‘Anomadassissa munino, lokajeṭṭhassa tādino;

Sudhāya lepanaṃ katvā, caṅkamaṃ kārayiṃ ahaṃ.

‘‘Nānāvaṇehi pupphehi, caṅkamaṃ santhariṃ ahaṃ;

Ākāse vitānaṃ katvā, bhojayiṃ buddhamuttamaṃ.

‘‘Añjaliṃ paggahetvāna, abhivādetvāna subbataṃ ;

Dīghasālaṃ bhagavato, niyyādesimahaṃ tadā.

‘‘Mama saṅkappamaññāya, satthā loke anuttaro;

Paṭiggahesi bhagavā, anukampāya cakkhumā.

‘‘Paṭiggahetvāna sambuddho, dakkhiṇeyyo sadevake;

Bhikkhusaṅghe nisīditvā, imā gāthā abhāsatha.

‘‘‘Yo so haṭṭhena cittena, dīghasālaṃ adāsi me;

Tamahaṃ kittayissāmi, suṇātha mama bhāsato.

‘‘‘Imassa maccukālamhi, puññakammasamaṅgino;

Sahassayuttassaratho, upaṭṭhissati tāvade.

‘‘‘Tena yānenayaṃ poso, devalokaṃ gamissati;

Anumodissare devā, sampatte kusalabbhave .

‘‘‘Mahārahaṃ byamhaṃ seṭṭhaṃ, ratanamattikalepanaṃ;

Kūṭāgāravarūpetaṃ, byamhaṃ ajjhāvasissati.

‘‘‘Tiṃsakappasahassāni, devaloke ramissati;

Pañcavīsati kappāni, devarājā bhavissati.

‘‘‘Sattasattatikkhattuñca, cakkavattī bhavissati;

Yasodharasanāmā te, sabbepi ekanāmakā.

‘‘‘Dve sampattī anubhotvā, vaḍḍhetvā puññasañcayaṃ;

Aṭṭhavīsatikappamhi, cakkavattī bhavissati.

‘‘‘Tatrāpi byamhaṃ pavaraṃ, vissakammena māpitaṃ;

Dasasaddāvivittaṃ taṃ, puramajjhāvasissati.

‘‘‘Aparimeyye ito kappe, bhūmipālo mahiddhiko;

Okkāko nāma nāmena, rājā raṭṭhe bhavissati.

‘‘‘Soḷasitthisahassānaṃ, sabbāsaṃ pavarā ca sā ;

Abhijātā khattiyānī, nava putte janessati.

‘‘‘Nava putte janetvāna, khattiyānī marissati;

Taruṇī ca piyā kaññā, mahesittaṃ karissati.

‘‘‘Okkākaṃ tosayitvāna, varaṃ kaññā labhissati;

Varaṃ laddhāna sā kaññā, putte pabbājayissati.

‘‘‘Pabbājitā ca te sabbe, gamissanti naguttamaṃ;

Jātibhedabhayā sabbe, bhaginīhi vasissare .

‘‘‘Ekā ca kaññā byādhīhi, bhavissati parikkhatā ;

Mā no jāti pabhijjīti, nikhaṇissanti khattiyā.

‘‘‘Khattiyo nīharitvāna, tāya saddhiṃ vasissati;

Bhavissati tadā bhedo, okkākakulasambhavo.

‘‘‘Tesaṃ pajā bhavissanti, koḷiyā nāma jātiyā;

Tattha mānusakaṃ bhogaṃ, anubhossatinappakaṃ.

‘‘‘Tamhā kāyā cavitvāna, devalokaṃ gamissati;

Tatrāpi pavaraṃ byamhaṃ, labhissati manoramaṃ.

‘‘‘Devalokā cavitvāna, sukkamūlena codito;

Āgantvāna manussattaṃ, soṇo nāma bhavissati.

‘‘‘Āraddhavīriyo pahitatto, padahaṃ satthu sāsane;

Sabbāsave pariññāya, nibbāyissatināsavo.

‘‘‘Anantadassī bhagavā, gotamo sakyapuṅgavo;

Visesaññū mahāvīro, aggaṭṭhāne ṭhapessati’.

‘‘Vuṭṭhamhi deve caturaṅgulamhi, tiṇe anileritaaṅgaṇamhi;

Ṭhatvāna yogassa payuttatādino, tatottariṃ pāramatā na vijjati.

‘‘Uttame damathe danto, cittaṃ me supaṇīhitaṃ;

Bhāro me ohito sabbo, nibbutomhi anāsavo.

‘‘Aṅgīraso mahānāgo, abhijātova kesarī;

Bhikkhusaṅghe nisīditvā, etadagge ṭhapesi maṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā soṇo koḷiviso thero imā gāthāyo abhāsitthāti.

‘‘Padumuttarasambuddhaṃ, mettacittaṃ mahāmuniṃ;

Upeti janatā sabbā, sabbalokagganāyakaṃ.

‘‘Sattukañca baddhakañca , āmisaṃ pānabhojanaṃ;

Dadanti satthuno sabbe, puññakkhette anuttare.

‘‘Ahampi dānaṃ dassāmi, devadevassa tādino;

Buddhaseṭṭhaṃ nimantetvā, saṅghampi ca anuttaraṃ.

‘‘Uyyojitā mayā cete, nimantesuṃ tathāgataṃ;

Kevalaṃ bhikkhusaṅghañca, puññakkhettaṃ anuttaraṃ.

‘‘Satasahassapallaṅkaṃ, sovaṇṇaṃ gonakatthataṃ;

Tūlikāpaṭalikāya, khomakappāsikehi ca;

Mahārahaṃ paññāpayiṃ, āsanaṃ buddhayuttakaṃ.

‘‘Padumuttaro lokavidū, devadevo narāsabho;

Bhikkhusaṅghaparibyūḷho, mama dvāramupāgami.

‘‘Paccuggantvāna sambuddhaṃ, lokanāthaṃ yasassinaṃ;

Pasannacitto sumano, abhināmayiṃ saṅgharaṃ .

‘‘Bhikkhūnaṃ satasahassaṃ, buddhañca lokanāyakaṃ;

Pasannacitto sumano, paramannena tappayiṃ.

‘‘Padumuttaro lokavidū, āhutīnaṃ paṭiggaho;

Bhikkhusaṅghe nisīditvā, imā gāthā abhāsatha.

‘‘‘Yenidaṃ āsanaṃ dinnaṃ, sovaṇṇaṃ gonakatthataṃ;

Tamahaṃ kittayissāmi, suṇātha mama bhāsato.

‘‘‘Catusattatikkhattuṃ so, devarajjaṃ karissati;

Anubhossati sampattiṃ, accharāhi purakkhato.

‘‘‘Padesarajjaṃ sahassaṃ, vasudhaṃ āvasissati;

Ekapaññāsakkhattuñca, cakkavattī bhavissati.

‘‘‘Sabbāsu bhavayonīsu, uccākulī bhavissati;

So ca pacchā pabbajitvā, sukkamūlena codito;

Bhaddiyo nāma nāmena, hessati satthu sāvako.

‘‘‘Vivekamanuyuttomhi, pantasenanivāsahaṃ;

Phalañcādhigataṃ sabbaṃ, cattaklesomhi ajjahaṃ.

‘‘‘Mama sabbaṃ abhiññāya, sabbaññū lokanāyako;

Bhikkhusaṅghe nisīditvā, etadagge ṭhapesi maṃ’.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bhaddiyo kāḷigodhāya putto thero imā gāthāyo abhāsitthāti.

‘‘Araññe kuṭikaṃ katvā, vasāmi pabbatantare;

Lābhālābhena santuṭṭho, yasena ayasena ca.

‘‘Padumuttaro lokavidū, āhutīnaṃ paṭiggaho;

Vasīsatasahassehi , āgacchi mama santikaṃ.

‘‘Upāgataṃ mahānāgaṃ , jalajuttamanāmakaṃ;

Tiṇasantharaṃ paññāpetvā, adāsiṃ satthuno ahaṃ.

‘‘Pasannacitto sumano, āmaṇḍaṃ pānīyañcahaṃ;

Adāsiṃ ujubhūtassa, vippasannena cetasā.

‘‘Satasahassito kappe , yaṃ dānamadadiṃ tadā;

Duggatiṃ nābhijānāmi, āmaṇḍassa idaṃ phalaṃ.

‘‘Ekatālīsakappamhi, eko āsiṃ arindamo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sanniṭṭhāpako thero imā gāthāyo abhāsitthāti.

‘‘Sumedho nāma sambuddho, gacchate antarāpaṇe;

Okkhittacakkhu mitabhāṇī, satimā saṃvutindriyo.

‘‘Pañca uppalahatthāni, āveḷatthaṃ ahaṃsu me;

Tena buddhaṃ apūjesiṃ, pasanno sehi pāṇibhi.

‘‘Āropitā ca te pupphā, chadanaṃ assu satthuno;

Samādhiṃsu mahānāgaṃ, sissā ācariyaṃ yathā.

‘‘Tiṃsakappasahassamhi, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Ito vīsakappasate, ahesuṃ pañca khattiyā;

Hatthiyā nāma nāmena, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pañcahatthiyo thero imā gāthāyo abhāsitthāti.

‘‘Nibbute lokanāthamhi, vipassimhaggapuggale;

Suphullapadumaṃ gayha, citamāropayiṃ ahaṃ.

‘‘Āropite ca citake, vehāsaṃ nabhamuggami;

Ākāse chadanaṃ katvā, citakamhi adhārayi.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Sattatālīsito kappe, padumissaranāmako;

Cāturanto vijitāvī, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumacchadaniyo thero imā gāthāyo abhāsitthāti;

‘‘Siddhatthassa bhagavato, mettacittassa tādino;

Sayanaggaṃ mayā dinnaṃ, dussabhaṇḍehi atthataṃ.

‘‘Paṭiggahesi bhagavā, kappiyaṃ sayanāsanaṃ;

Uṭṭhāya sayanā tamhā, vehāsaṃ uggamī jino.

‘‘Catunnavutito kappe, yaṃ sayanamadāsahaṃ;

Duggatiṃ nābhijānāmi, sayanassa idaṃ phalaṃ.

‘‘Ekapaññāsito kappe, varako devasavhayo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sayanadāyako thero imā gāthāyo abhāsitthāti.

‘‘Atthadassissa munino, lokajeṭṭhassa tādino;

Iṭṭhakāhi cinitvāna, caṅkamaṃ kārayiṃ ahaṃ.

‘‘Uccato pañcaratanaṃ, caṅkamaṃ sādhumāpitaṃ;

Āyāmato hatthasataṃ, bhāvanīyyaṃ manoramaṃ.

‘‘Paṭiggahesi bhagavā, atthadassī naruttamo;

Hatthena pulinaṃ gayha, imā gāthā abhāsatha.

‘‘‘Iminā pulinadānena, caṅkamaṃ sukatena ca;

Sattaratanasampannaṃ, pulinaṃ anubhossati.

‘‘‘Tīṇi kappāni devesu, devarajjaṃ karissati;

Anubhossati sampattiṃ, accharāhi purakkhato.

‘‘‘Manussalokamāgantvā, rājā raṭṭhe bhavissati;

Tikkhattuṃ cakkavattī ca, mahiyā so bhavissati’.

‘‘Aṭṭhārase kappasate, yaṃ kammamakariṃ tadā;

Duggatiṃ nābhijānāmi, caṅkamassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā caṅkamanadāyako thero imā gāthāyo abhāsitthāti.

‘‘Padumuttaro lokavidū, āhutīnaṃ paṭiggaho;

Janataṃ uddharitvāna, nibbāyati mahāyaso.

‘‘Nibbāyante ca sambuddhe, dasasahassi kampatha;

Janakāyo mahā āsi, devā sannipatuṃ tadā.

‘‘Candanaṃ pūrayitvāna, tagarāmallikāhi ca;

Haṭṭho haṭṭhena cittena, āropayiṃ naruttamaṃ.

‘‘Mama saṅkappamaññāya, satthā loke anuttaro;

Nipannakova sambuddho, imā gāthā abhāsatha.

‘‘‘Yo me pacchimake kāle, gandhamālena chādayi;

Tamahaṃ kittayissāmi, suṇātha mama bhāsato.

‘‘‘Ito cuto ayaṃ poso, tusitakāyaṃ gamissati;

Tattha rajjaṃ karitvāna, nimmānaṃ so gamissati.

‘‘‘Eteneva upāyena, datvā mālaṃ varuttamaṃ;

Sakakammābhiraddho so, sampattiṃ anubhossati.

‘‘‘Punāpi tusite kāye, nibbattissatiyaṃ naro;

Tamhā kāyā cavitvāna, manussattaṃ gamissati.

‘‘‘Sakyaputto mahānāgo, aggo loke sadevake;

Bodhayitvā bahū satte, nibbāyissati cakkhumā.

‘‘‘Tadā sopagato santo, sukkamūlena codito;

Upasaṅkamma sambuddhaṃ, pañhaṃ pucchissati tadā.

‘‘‘Hāsayitvāna sambuddho, sabbaññū lokanāyako;

Puññakammaṃ pariññāya, saccāni vivarissati.

‘‘‘Āraddho ca ayaṃ pañho, tuṭṭho ekaggamānaso;

Satthāraṃ abhivādetvā, pabbajjaṃ yācayissati.

‘‘‘Pasannamānasaṃ disvā, sakakammena tositaṃ;

Pabbājessati so buddho, aggamaggassa kovido.

‘‘‘Vāyamitvānayaṃ poso, sammāsambuddhasāsane;

Sabbāsave pariññāya, nibbāyissatināsavo’.

‘‘Pubbakammena saṃyutto, ekaggo susamāhito;

Buddhassa oraso putto, dhammajomhi sunimmito.

‘‘Dhammarājaṃ upagamma, apucchiṃ pañhamuttamaṃ;

Kathayanto ca me pañhaṃ, dhammasotaṃ upānayi.

‘‘Tassāhaṃ dhammamaññāya, vihāsiṃ sāsane rato;

Sabbāsave pariññāya, viharāmi anāsavo.

‘‘Satasahassito kappe, jalajuttamanāyako;

Nibbāyi anupādāno, dīpova telasaṅkhayā.

‘‘Sattayojanikaṃ āsi, thūpañca ratanāmayaṃ;

Dhajaṃ tattha apūjesiṃ, sabbabhaddaṃ manoramaṃ.

‘‘Kassapassa ca buddhassa, tisso nāmaggasāvako;

Putto me oraso āsi, dāyādo jinasāsane.

‘‘Tassa hīnena manasā, vācaṃ bhāsiṃ abhaddakaṃ;

Tena kammavipākena, pacchā me āsi bhaddakaṃ .

‘‘Upavattane sālavane, pacchime sayane muni;

Pabbājesi mahāvīro, hito kāruṇiko jino.

‘‘Ajjeva dāni pabbajjā, ajjeva upasampadā;

Ajjeva parinibbānaṃ, sammukhā dvipaduttame.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā subhaddo thero imā gāthāyo abhāsitthāti.

‘‘Siddhatthassa bhagavato, lokajeṭṭhassa tādino;

Agghiyaṃ kārayitvāna, jātipupphehi chādayiṃ.

‘‘Niṭṭhāpetvāna taṃ pupphaṃ, buddhassa upanāmayiṃ;

Pupphāvasesaṃ paggayha, buddhassa abhiropayiṃ.

‘‘Kañcanagghiyasaṅkāsaṃ, buddhaṃ lokagganāyakaṃ;

Pasannacitto sumano, pupphagghiyamupānayiṃ.

‘‘Vitiṇṇakaṅkho sambuddho, tiṇṇoghehi purakkhato;

Bhikkhusaṅghe nisīditvā, imā gāthā abhāsatha.

‘‘‘Dibbagandhaṃ pavāyantaṃ, yo me pupphagghiyaṃ adā;

Tamahaṃ kittayissāmi, suṇātha mama bhāsato.

‘‘‘Ito cuto ayaṃ poso, devasaṅghapurakkhato;

Jātipupphehi parikiṇṇo, devalokaṃ gamissati.

‘‘‘Ubbiddhaṃ bhavanaṃ tassa, sovaṇṇañca maṇīmayaṃ;

Byamhaṃ pātubhavissati, puññakammappabhāvitaṃ.

‘‘‘Catusattatikkhattuṃ so, devarajjaṃ karissati;

Anubhossati sampattiṃ, accharāhi purakkhato.

‘‘‘Pathabyā rajjaṃ tisataṃ, vasudhaṃ āvasissati;

Pañcasattatikkhattuñca, cakkavattī bhavissati.

‘‘‘Dujjayo nāma nāmena, hessati manujādhipo;

Anubhotvāna taṃ puññaṃ, sakakammaṃ apassito .

‘‘‘Vinipātaṃ agantvāna, manussattaṃ gamissati;

Hiraññaṃ tassa nicitaṃ, koṭisatamanappakaṃ.

‘‘‘Nibbattissati yonimhi, brāhmaṇe so bhavissati;

Vaṅgantassa suto dhīmā, sāriyā oraso piyo.

‘‘‘So ca pacchā pabbajitvā, aṅgīrasassa sāsane;

Cūḷacundoti nāmena, hessati satthu sāvako.

‘‘‘Sāmaṇerova so santo, khīṇāsavo bhavissati;

Sabbāsave pariññāya, nibbāyissatināsavo’.

‘‘Upaṭṭhahiṃ mahāvīraṃ, aññe ca pesale bahū;

Bhātaraṃ me cupaṭṭhāsiṃ, uttamatthassa pattiyā.

‘‘Bhātaraṃ me upaṭṭhitvā, dhātuṃ pattamhi ohiya ;

Sambuddhaṃ upanāmesiṃ, lokajeṭṭhaṃ narāsabhaṃ.

‘‘Ubho hatthehi paggayha, buddho loke sadevake;

Sandassayanto taṃ dhātuṃ, kittayi aggasāvakaṃ.

‘‘Cittañca suvimuttaṃ me, saddhā mayhaṃ patiṭṭhitā;

Sabbāsave pariññāya, viharāmi anāsavo.

‘‘Paṭisambhidānuppattā, vimokkhāpi ca phassitā ;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā cundo thero imā gāthāyo abhāsitthāti.