6. Bījanivaggo

‘‘Padumuttarabuddhassa, lokajeṭṭhassa tādino;

Bījanikā mayā dinnā, dvipadindassa tādino.

‘‘Sakaṃ cittaṃ pasādetvā, paggahetvāna añjaliṃ;

Sambuddhamabhivādetvā, pakkamiṃ uttarāmukho.

‘‘Bījaniṃ paggahetvāna, satthā lokagganāyako ;

Bhikkhusaṅghe ṭhito santo, imā gāthā abhāsatha.

‘‘‘Iminā bījanidānena, cittassa paṇidhīhi ca;

Kappānaṃ satasahassaṃ, vinipātaṃ na gacchati’.

‘‘Āraddhavīriyo pahitatto, cetoguṇasamāhito;

Jātiyā sattavassohaṃ, arahattaṃ apāpuṇiṃ.

‘‘Saṭṭhikappasahassamhi, bījamānasanāmakā;

Soḷasāsiṃsu rājāno, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā vidhūpanadāyako thero imā gāthāyo abhāsitthāti.

‘‘Ubbiddhaṃ selamāruyha, nisīdi purisuttamo;

Pabbatassāvidūramhi, brāhmaṇo mantapāragū.

‘‘Upaviṭṭhaṃ mahāvīraṃ, devadevaṃ narāsabhaṃ;

Añjaliṃ paggahetvāna, santhaviṃ lokanāyakaṃ.

‘‘‘Esa buddho mahāvīro, varadhammappakāsako;

Jalati aggikhandhova, bhikkhusaṅghapurakkhato.

‘‘‘Mahāsamuddova‘kkhubbho , aṇṇavova duruttaro;

Migarājāvasambhīto , dhammaṃ deseti cakkhumā’.

‘‘Mama saṅkappamaññāya, padumuttaranāyako;

Bhikkhusaṅghe ṭhito satthā, imā gāthā abhāsatha.

‘‘‘Yenāyaṃ añjalī dinno, buddhaseṭṭho ca thomito;

Tiṃsakappasahassāni, devarajjaṃ karissati.

‘‘‘Kappasatasahassamhi, aṅgīrasasanāmako;

Vivaṭṭacchado sambuddho, uppajjissati tāvade.

‘‘‘Tassa dhammesu dāyādo, oraso dhammanimmito;

Sataraṃsīti nāmena, arahā so bhavissati’.

‘‘Jātiyā sattavassohaṃ, pabbajiṃ anagāriyaṃ;

Sataraṃsimhi nāmena, pabhā niddhāvate mama.

‘‘Maṇḍape rukkhamūle vā, jhāyī jhānarato ahaṃ;

Dhāremi antimaṃ dehaṃ, sammāsambuddhasāsane.

‘‘Saṭṭhikappasahassamhi, caturo rāmanāmakā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sataraṃsi thero imā gāthāyo abhāsitthāti.

‘‘Padumuttarabuddhassa, sabbalokānukampino;

Sayanaṃ tassa pādāsiṃ, vippasannena cetasā.

‘‘Tena sayanadānena, sukhette bījasampadā;

Bhogā nibbattare tassa, sayanassa idaṃ phalaṃ.

‘‘Ākāse seyyaṃ kappemi, dhāremi pathaviṃ imaṃ;

Pāṇesu me issariyaṃ, sayanassa idaṃ phalaṃ.

‘‘Pañcakappasahassamhi, aṭṭha āsuṃ mahātejā ;

Catuttiṃse kappasate, caturo ca mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sayanadāyako thero imā gāthāyo abhāsitthāti.

‘‘Padumuttarabuddhassa, mahābodhimaho ahu;

Vicittaṃ ghaṭamādāya, gandhodakamadāsahaṃ.

‘‘Nhānakāle ca bodhiyā, mahāmegho pavassatha;

Ninnādo ca mahā āsi, asaniyā phalantiyā.

‘‘Tenevāsanivegena, tattha kālaṅkato ahaṃ ;

Devaloke ṭhito santo, imā gāthā abhāsahaṃ.

‘‘‘Aho buddho aho dhammo, aho no satthusampadā;

Kaḷevaraṃ me patitaṃ, devaloke ramāmahaṃ.

‘‘‘Ubbiddhaṃ bhavanaṃ mayhaṃ, satabhūmaṃ samuggataṃ;

Kaññāsatasahassāni, parivārenti maṃ sadā.

‘‘‘Ābādhā me na vijjanti, soko mayhaṃ na vijjati;

Pariḷāhaṃ na passāmi, puññakammassidaṃ phalaṃ.

‘‘‘Aṭṭhavīse kappasate, rājā saṃvasito ahuṃ;

Sattaratanasampanno, cakkavattī mahabbalo’.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā gandhodakiyo thero imā gāthāyo abhāsitthāti.

‘‘Padumuttarabuddhassa, ājānīyamadāsahaṃ;

Niyyādetvāna sambuddhe , agamāsiṃ sakaṃ gharaṃ.

‘‘Devalo nāma nāmena, satthuno aggasāvako;

Varadhammassa dāyādo, āgacchi mama santikaṃ.

‘‘Sapattabhāro bhagavā, ājāneyyo na kappati;

Tava saṅkappamaññāya, adhivāsesi cakkhumā.

‘‘Agghāpetvā vātajavaṃ, sindhavaṃ sīghavāhanaṃ;

Padumuttarabuddhassa, khamanīyamadāsahaṃ.

‘‘Yaṃ yaṃ yonupapajjāmi, devattaṃ atha mānusaṃ ;

Khamanīyaṃ vātajavaṃ, cittaṃ nibbattate mama.

‘‘Lābhaṃ tesaṃ suladdhaṃva, ye labhantupasampadaṃ;

Punapi payirupāseyyaṃ, buddho loke sace bhave.

‘‘Aṭṭhavīsatikkhattuṃhaṃ, rājā āsiṃ mahabbalo;

Cāturanto vijitāvī, jambusaṇḍassa jambuissaro.

‘‘Idaṃ pacchimakaṃ mayhaṃ, carimo vattate bhavo;

Pattosmi acalaṃ ṭhānaṃ, hitvā jayaparājayaṃ.

‘‘Catutiṃsasahassamhi, mahātejosi khattiyo;

Sataratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā opavayho thero imā gāthāyo abhāsitthāti.

‘‘Padumuttarabuddhassa, piṇḍapātaṃ adāsahaṃ;

Gantvā kiliṭṭhakaṃ ṭhānaṃ , mallikāhi parikkhitaṃ .

‘‘Tamhāsanamhi āsīno, buddho lokagganāyako;

Akittayi piṇḍapātaṃ, ujubhūto samāhito.

‘‘Yathāpi bhaddake khette, bījaṃ appampi ropitaṃ;

Sammā dhāraṃ pavecchante, phalaṃ toseti kassakaṃ.

‘‘Tathevāyaṃ piṇḍapāto, sukhette ropito tayā;

Bhave nibbattamānamhi, phalaṃ te tosayissati .

‘‘Idaṃ vatvāna sambuddho, jalajuttamanāmako;

Piṇḍapātaṃ gahetvāna, pakkāmi uttarāmukho.

‘‘Saṃvuto pātimokkhasmiṃ, indriyesu ca pañcasu;

Pavivekamanuyutto, viharāmi anāsavo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saparivārāsano thero imā gāthāyo abhāsitthāti.

‘‘Padumuttarabuddhassa, sabbabhūtānukampino;

Saddahitvāna saddhamme, ujudiṭṭhi ahosahaṃ.

‘‘Padīpadānaṃ pādāsiṃ, parivāretvāna bodhiyaṃ;

Saddahanto padīpāni, akariṃ tāvade ahaṃ.

‘‘Yaṃ yaṃ yonupapajjāmi, devattaṃ atha mānusaṃ;

Ākāse ukkaṃ dhārenti, dīpadānassidaṃ phalaṃ.

‘‘Tirokuṭṭaṃ tiroselaṃ, samatiggayha pabbataṃ;

Samantā yojanasataṃ, dassanaṃ anubhomahaṃ.

‘‘Tena kammāvasesena, pattomhi āsavakkhayaṃ;

Dhāremi antimaṃ dehaṃ, dvipadindassa sāsane.

‘‘Catuttiṃse kappasate, satacakkhusanāmakā;

Rājāhesuṃ mahātejā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pañcadīpako thero imā gāthāyo abhāsitthāti.

‘‘Padumuttarabuddhassa, bodhiyā pādaputtame;

Haṭṭho haṭṭhena cittena, dhajamāropayiṃ ahaṃ.

‘‘Patitapattāni gaṇhitvā, bahiddhā chaḍḍayiṃ ahaṃ;

Antosuddhaṃ bahisuddhaṃ, adhimuttamanāsavaṃ.

‘‘Sammukhā viya sambuddhaṃ, avandiṃ bodhimuttamaṃ;

Padumuttaro lokavidū, āhutīnaṃ paṭiggaho.

‘‘Bhikkhusaṅghe ṭhito satthā, imā gāthā abhāsatha;

‘‘‘Iminā dhajadānena, upaṭṭhānena cūbhayaṃ.

‘‘‘Kappānaṃ satasahassaṃ, duggatiṃ so na gacchati;

Devesu devasobhagyaṃ, anubhossatinappakaṃ.

‘‘‘Anekasatakkhattuñca, rājā raṭṭhe bhavissati;

Uggato nāma nāmena, cakkavattī bhavissati.

‘‘‘Sampattiṃ anubhotvāna, sukkamūlena codito;

Gotamassa bhagavato, sāsanebhiramissati’.

‘‘Padhānapahitattomhi, upasanto nirūpadhi;

Dhāremi antimaṃ dehaṃ, sammāsambuddhasāsane.

‘‘Ekapaññāsasahasse, kappe uggatasavhayo ;

Paññāsasatasahasse, khattiyo meghasavhayo .

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhajadāyako thero imā gāthāyo abhāsitthāti.

‘‘Catusaccaṃ pakāsento, varadhammappavattako;

Vassate amataṃ vuṭṭhiṃ, nibbāpento mahājanaṃ.

‘‘Sadhajaṃ padumaṃ gayha, aḍḍhakose ṭhito ahaṃ;

Padumuttaramunissa, pahaṭṭho ukkhipimambare.

‘‘Āgacchante ca padume, abbhuto āsi tāvade;

Mama saṅkappamaññāya, paggaṇhi vadataṃ varo.

‘‘Karaseṭṭhena paggayha, jalajaṃ pupphamuttamaṃ;

Bhikkhusaṅghe ṭhito satthā, imā gāthā abhāsatha.

‘‘‘Yenidaṃ padumaṃ khittaṃ, sabbaññumhi vināyake ;

Tamahaṃ kittayissāmi, suṇātha mama bhāsato.

‘‘‘Tiṃsakappāni devindo, devarajjaṃ karissati;

Pathabyā rajjaṃ sattasataṃ, vasudhaṃ āvasissati.

‘‘‘Tattha pattaṃ gaṇetvāna, cakkavattī bhavissati;

Ākāsato pupphavuṭṭhi, abhivassissatī tadā.

‘‘‘Kappasatasahassamhi, okkākakulasambhavo;

Gotamo nāma nāmena, satthā loke bhavissati.

‘‘‘Tassa dhammesu dāyādo, oraso dhammanimmito;

Sabbāsave pariññāya, nibbāyissatināsavo’.

‘‘Nikkhamitvāna kucchimhā, sampajāno patissato;

Jātiyā pañcavassohaṃ, arahattaṃ apāpuṇiṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumo thero imā gāthāyo abhāsitthāti.

‘‘Jātiyā sattavassohaṃ, addasaṃ lokanāyakaṃ;

Pasannacitto sumano, upagacchiṃ naruttamaṃ.

‘‘Tissassāhaṃ bhagavato, lokajeṭṭhassa tādino;

Haṭṭho haṭṭhena cittena, ropayiṃ bodhimuttamaṃ.

‘‘Asano nāmadheyyena, dharaṇīruhapādapo;

Pañcavasse paricariṃ, asanaṃ bodhimuttamaṃ.

‘‘Pupphitaṃ pādapaṃ disvā, abbhutaṃ lomahaṃsanaṃ;

Sakaṃ kammaṃ pakittento, buddhaseṭṭhaṃ upāgamiṃ.

‘‘Tisso tadā so sambuddho, sayambhū aggapuggalo;

Bhikkhusaṅghe nisīditvā, imā gāthā abhāsatha.

‘‘‘Yenāyaṃ ropitā bodhi, buddhapūjā ca sakkatā;

Tamahaṃ kittayissāmi, suṇātha mama bhāsato.

‘‘‘Tiṃsakappāni devesu, devarajjaṃ karissati;

Catusaṭṭhi cakkhattuṃ so, cakkavattī bhavissati.

‘‘‘Tusitā hi cavitvāna, sukkamūlena codito;

Dve sampattī anubhotvā, manussatte ramissati.

‘‘‘Padhānapahitatto so, upasanto nirūpadhi;

Sabbāsave pariññāya, nibbāyissatināsavo’.

‘‘Vivekamanuyuttohaṃ, upasanto nirūpadhi;

Nāgova bandhanaṃ chetvā, viharāmi anāsavo.

‘‘Dvenavute ito kappe, bodhiṃ ropesahaṃ tadā;

Duggatiṃ nābhijānāmi, bodhiropassidaṃ phalaṃ.

‘‘Catusattatito kappe, daṇḍasenoti vissuto;

Sattaratanasampanno, cakkavattī tadā ahuṃ.

‘‘Tesattatimhito kappe, sattāhesuṃ mahīpatī;

Samantanemināmena, rājāno cakkavattino.

‘‘Paṇṇavīsatito kappe, puṇṇako nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā asanabodhiyo thero imā gāthāyo abhāsitthāti.