9. Timiravaggo

‘‘Candabhāgānadītīre, anusotaṃ vajāmahaṃ;

Nisinnaṃ samaṇaṃ disvā, vippasannamanāvilaṃ.

‘‘Tattha cittaṃ pasādetvā , evaṃ cintesahaṃ tadā;

Tārayissati tiṇṇoyaṃ, dantoyaṃ damayissati.

‘‘Assāsissati assattho, santo ca samayissati;

Mocayissati mutto ca, nibbāpessati nibbuto.

‘‘Evāhaṃ cintayitvāna, siddhatthassa mahesino;

Gahetvā timirapupphaṃ, matthake okiriṃ ahaṃ .

‘‘Añjaliṃ paggahetvāna, katvā ca naṃ padakkhiṇaṃ;

Vanditvā satthuno pāde, pakkāmiṃ aparaṃ disaṃ.

‘‘Aciraṃ gatamattaṃ maṃ, migarājā viheṭhayi;

Papātamanugacchanto, tattheva papatiṃ ahaṃ.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

‘‘Chappaññāsamhi kappamhi, sattevāsuṃ mahāyasā ;

Sattaratanasampannā, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā timirapupphiyo thero imā gāthāyo abhāsitthāti.

‘‘Jātiyā sattavassohaṃ, pabbajiṃ anagāriyaṃ;

Avandiṃ satthuno pāde, vippasannena cetasā.

‘‘Sattanaṅgalakīpupphe, ākāse ukkhipiṃ ahaṃ;

Tissaṃ buddhaṃ samuddissa, anantaguṇasāgaraṃ.

‘‘Sugatānugataṃ maggaṃ, pūjetvā haṭṭhamānaso;

Añjaliñca tadākāsiṃ, pasanno sehi pāṇibhi.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Ito aṭṭhamake kappe, tayo aggisikhā ahu;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā gatasaññako thero imā gāthāyo abhāsitthāti.

‘‘Rukkhamūle nisinnohaṃ, byādhito paramena ca;

Paramakāruññapattomhi, araññe kānane ahaṃ.

‘‘Anukampaṃ upādāya, tisso satthā upesi maṃ;

Sohaṃ nipannako santo, sire katvāna añjaliṃ.

‘‘Pasannacitto sumano, sabbasattānamuttamaṃ;

Sambuddhaṃ abhivādetvā, tattha kālaṅkato ahaṃ.

‘‘Dvenavute ito kappe, yaṃ vandiṃ purisuttamaṃ;

Duggatiṃ nābhijānāmi, vandanāya idaṃ phalaṃ.

‘‘Ito pañcamake kappe, pañcevāsuṃ mahāsikhā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā nipannañjaliko thero imā gāthāyo abhāsitthāti.

‘‘Abhibhū nāma so bhikkhu, sikhino aggasāvako;

Mahānubhāvo tevijjo, himavantaṃ upāgami.

‘‘Ahampi himavantamhi, ramaṇīyassame isi;

Vasāmi appamaññāsu, iddhīsu ca tadā vasī.

‘‘Pakkhijāto viyākāse, pabbataṃ adhivattayiṃ ;

Adhopupphaṃ gahetvāna, āgacchiṃ pabbataṃ ahaṃ.

‘‘Satta pupphāni gaṇhitvā, matthake okiriṃ ahaṃ;

Ālokite ca vīrena, pakkāmiṃ pācināmukho.

‘‘Āvāsaṃ abhisambhosiṃ, patvāna assamaṃ ahaṃ;

Khāribhāraṃ gahetvāna, pāyāsiṃ pabbatantaraṃ.

‘‘Ajagaro maṃ pīḷesi, ghorarūpo mahabbalo;

Pubbakammaṃ saritvāna, tattha kālaṅkato ahaṃ.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā adhopupphiyo thero imā gāthāyo abhāsitthāti.

‘‘Pabbate himavantamhi, vāsaṃ kappesahaṃ pure;

Ajinuttaravāsohaṃ, vasāmi pabbatantare.

‘‘Suvaṇṇavaṇṇaṃ sambuddhaṃ, sataraṃsiṃva bhāṇumaṃ;

Vanantaragataṃ disvā, sālarājaṃva pupphitaṃ.

‘‘Raṃsyā cittaṃ pasādetvā, vipassissa mahesino;

Paggayha añjaliṃ vandiṃ, sirasā ukkuṭī ahaṃ.

‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, raṃsisaññāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā raṃsisaññako thero imā gāthāyo abhāsitthāti.

‘‘Pabbate himavantamhi, vākacīradharo ahaṃ;

Caṅkamañca samārūḷho, nisīdiṃ pācināmukho.

‘‘Pabbate sugataṃ disvā, phussaṃ jhānarataṃ tadā;

Añjaliṃ paggahetvāna, raṃsyā cittaṃ pasādayiṃ.

‘‘Dvenavute ito kappe, yaṃ saññamalabhiṃ tadā;

Duggatiṃ nābhijānāmi, raṃsisaññāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā raṃsisaññako thero imā gāthāyo abhāsitthāti.

‘‘Pabbate himavantamhi, kharājinadharo ahaṃ;

Phussaṃ jinavaraṃ disvā, phalahattho phalaṃ adaṃ.

‘‘Yamahaṃ phalamadāsiṃ, vippasannena cetasā;

Bhave nibbattamānamhi, phalaṃ nibbattate mama.

‘‘Dvenavute ito kappe, yaṃ phalaṃ adadiṃ ahaṃ;

Duggatiṃ nābhijānāmi, phaladānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā phaladāyako thero imā gāthāyo abhāsitthāti.

‘‘Pabbate himavantamhi, vasāmi paṇṇasanthare;

Phussassa dhammaṃ bhaṇato, sadde cittaṃ pasādayiṃ.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, puññakammassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saddasaññako thero imā gāthāyo abhāsitthāti.

‘‘Vipassissa bhagavato, mahābodhimaho ahu;

Pabbajjupagato santo, upagacchiṃ ahaṃ tadā.

‘‘Kusumodakamādāya, bodhiyā okiriṃ ahaṃ;

Mocayissati no mutto, nibbāpessati nibbuto.

‘‘Ekanavutito kappe, yaṃ bodhimabhisiñcayiṃ;

Duggatiṃ nābhijānāmi, bodhisiñcāyidaṃ phalaṃ.

‘‘Tettiṃse vattamānamhi, kappe āsuṃ janādhipā;

Udakasecanā nāma, aṭṭhete cakkavattino.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bodhisiñcako thero imā gāthāyo abhāsitthāti.

‘‘Pokkharavanaṃ paviṭṭho, bhañjanto padumānihaṃ;

Tatthaddasaṃ phussaṃ buddhaṃ , bāttiṃsavaralakkhaṇaṃ.

‘‘Padumapupphaṃ gahetvāna, ākāse ukkhipiṃ ahaṃ;

Pāpakammaṃ saritvāna, pabbajiṃ anagāriyaṃ.

‘‘Pabbajitvāna kāyena, manasā saṃvutena ca;

Vacīduccaritaṃ hitvā, ājīvaṃ parisodhayiṃ.

‘‘Dvenavute ito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Padumābhāsanāmā ca, aṭṭhārasa mahīpatī;

Aṭṭhārasesu kappesu, aṭṭhatālīsamāsisuṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumapupphiyo thero imā gāthāyo abhāsitthāti;