36. Saddasaññakavaggo

‘‘Migaluddo pure āsiṃ, araññe kānane ahaṃ;

Tatthaddasāsiṃ sambuddhaṃ, devasaṅghapurakkhataṃ.

‘‘Catusaccaṃ pakāsentaṃ, uddharantaṃ mahājanaṃ;

Assosiṃ madhuraṃ vācaṃ, karavīkarudopamaṃ .

‘‘Brahmasarassa munino, sikhino lokabandhuno;

Ghose cittaṃ pasādetvā, pattomhi āsavakkhayaṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, pasādassa idaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā saddasaññako thero imā gāthāyo abhāsitthāti.

‘‘Nagare aruṇavatiyā, āsiṃ yavasiko tadā;

Panthe disvāna sambuddhaṃ, yavakalāpaṃ santhariṃ .

‘‘Anukampako kāruṇiko, sikhī lokagganāyako;

Mama saṅkappamaññāya, nisīdi yavasanthare.

‘‘Disvā nisinnaṃ vimalaṃ, mahājhāyiṃ vināyakaṃ;

Pāmojjaṃ janayitvāna, tattha kālaṅkato ahaṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, yavatthare idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā yavakalāpiyo thero imā gāthāyo abhāsitthāti.

‘‘Kiṃsukaṃ pupphitaṃ disvā, paggahetvāna añjaliṃ;

Buddhaṃ saritvā siddhatthaṃ, ākāse abhipūjayiṃ.

‘‘Catunnavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kiṃsukapūjako thero imā gāthāyo abhāsitthāti.

‘‘Akkantañca padaṃ disvā, sikhino lokabandhuno;

Ekaṃsaṃ ajinaṃ katvā, padaseṭṭhaṃ avandahaṃ.

‘‘Koraṇḍaṃ pupphitaṃ disvā, pādapaṃ dharaṇīruhaṃ;

Sakosakaṃ gahetvāna, padacakkaṃ apūjayiṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, padapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sakosaka koraṇḍadāyako thero imā gāthāyo abhāsitthāti.

‘‘Kānanaṃ vanamogayha, veḷuṃ chetvānahaṃ tadā;

Ālambanaṃ karitvāna, saṅghassa adadaṃ ahaṃ.

‘‘Tena cittappasādena, subbate abhivādiya;

Ālambanampi datvāna, pakkāmiṃ uttarāmukho.

‘‘Catunnavutito kappe, yaṃ daṇḍamadadiṃ tadā;

Duggatiṃ nābhijānāmi, daṇḍadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā daṇḍadāyako thero imā gāthāyo abhāsitthāti.

‘‘Sataraṃsī nāma sambuddho, sayambhū aparājito;

Vuṭṭhahitvā samādhimhā, bhikkhāya mamupāgami.

‘‘Paccekabuddhaṃ disvāna, ambayāguṃ adāsahaṃ;

Vippasannamanaṃ tassa, vippasannena cetasā.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, ambayāguyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ambayāgudāyako thero imā gāthāyo abhāsitthāti.

‘‘Divāvihārā nikkhanto, vipassī lokanāyako;

Bhikkhāya vicaranto so, mama santikupāgami.

‘‘Tato patīto sumano, buddhaseṭṭhassa tādino;

Loṇasupuṭakaṃ datvā, kappaṃ saggamhi modahaṃ.

‘‘Ekanavutito kappe, yaṃ puṭakamadāsahaṃ;

Duggatiṃ nābhijānāmi, puṭakassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā supuṭakapūjako thero imā gāthāyo abhāsitthāti.

‘‘Vipassino bhagavato, lokajeṭṭhassa tādino;

Ekaṃ mañcaṃ mayā dinnaṃ, pasannena sapāṇinā.

‘‘Hatthiyānaṃ assayānaṃ, dibbayānaṃ samajjhagaṃ;

Tena mañcakadānena, pattomhi āsavakkhayaṃ.

‘‘Ekanavutito kappe, yaṃ mañcamadadiṃ tadā;

Duggatiṃ nābhijānāmi, mañcadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā mañcadāyako thero imā gāthāyo abhāsitthāti.

‘‘Āruhimha tadā nāvaṃ, bhikkhu cājīvako cahaṃ;

Nāvāya bhijjamānāya, bhikkhu me saraṇaṃ adā.

‘‘Ekattiṃse ito kappe, yañca me saraṇaṃ adā;

Duggatiṃ nābhijānāmi, saraṇāgamane phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saraṇagamaniyo thero imā gāthāyo abhāsitthāti.

‘‘Tisso nāmāsi sambuddho, vihāsi vipine tadā;

Tusitā hi idhāgantvā, piṇḍapātaṃ adāsahaṃ.

‘‘Sambuddhamabhivādetvā, tissaṃ nāma mahāyasaṃ;

Sakaṃ cittaṃ pasādetvā, tusitaṃ agamāsahaṃ.

‘‘Dvenavute ito kappe, yaṃ dānamadadiṃ tadā;

Duggatiṃ nābhijānāmi, piṇḍapātassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā piṇḍapātiko thero imā gāthāyo abhāsitthāti.