23. Ālambaṇadāyakavaggo

‘‘Atthadassissa bhagavato, lokajeṭṭhassa tādino;

Ālambaṇaṃ mayā dinnaṃ, dvipadindassa tādino.

‘‘Dharaṇiṃ paṭipajjāmi, vipulaṃ sāgarapparaṃ;

Pāṇesu ca issariyaṃ, vattemi vasudhāya ca.

‘‘Kilesā jhāpitā mayhaṃ, bhavā sabbe samūhatā;

Tisso vijjā anuppattā, kataṃ buddhassa sāsanaṃ.

‘‘Ito dvesaṭṭhikappamhi, tayo āsiṃsu khattiyā;

Ekāpassitanāmā te, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ālambaṇadāyako thero imā gāthāyo abhāsitthāti.

‘‘Ekattiṃse ito kappe, gaṇasatthārako ahaṃ;

Addasaṃ virajaṃ buddhaṃ, āhutīnaṃ paṭiggahaṃ.

‘‘Cammakhaṇḍaṃ mayā dinnaṃ, sikhino lokabandhuno;

Tena kammena dvipadinda, lokajeṭṭha narāsabha.

‘‘Sampattiṃ anubhotvāna, kilese jhāpayiṃ ahaṃ;

Dhāremi antimaṃ dehaṃ, sammāsambuddhasāsane.

‘‘Ekattiṃse ito kappe, ajinaṃ yaṃ adāsahaṃ;

Duggatiṃ nābhijānāmi, ajinassa idaṃ phalaṃ.

‘‘Ito pañcamake kappe, rājā āsiṃ sudāyako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ajinadāyako thero imā gāthāyo abhāsitthāti.

‘‘Migaluddo pure āsiṃ, araññe kānane ahaṃ;

Addasaṃ virajaṃ buddhaṃ, āhutīnaṃ paṭiggahaṃ.

‘‘Maṃsapesi mayā dinnā, vipassissa mahesino;

Sadevakasmiṃ lokasmiṃ, issaraṃ kārayāmahaṃ.

‘‘Iminā maṃsadānena, ratanaṃ nibbattate mama;

Duveme ratanā loke, diṭṭhadhammassa pattiyā.

‘‘Tehaṃ sabbe anubhomi, maṃsadānassa sattiyā;

Gattañca mudukaṃ mayhaṃ, paññā nipuṇavedanī.

‘‘Ekanavutito kappe, yaṃ maṃsamadadiṃ tadā;

Duggatiṃ nābhijānāmi, maṃsadānassidaṃ phalaṃ.

‘‘Ito catutthake kappe, eko āsiṃ janādhipo;

Mahārohitanāmo so, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dverataniyo thero imā gāthāyo abhāsitthāti.

‘‘Siddhatthassa bhagavato, vedi kārāpitā mayā;

Ārakkho ca mayā dinno, sugatassa mahesino.

‘‘Tena kammavisesena, na passiṃ bhayabheravaṃ;

Kuhiñci upapannassa, tāso mayhaṃ na vijjati.

‘‘Catunnavutito kappe, yaṃ vediṃ kārayiṃ pure;

Duggatiṃ nābhijānāmi, vedikāya idaṃ phalaṃ.

‘‘Ito chaṭṭhamhi kappamhi, apassenasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ārakkhadāyako thero imā gāthāyo abhāsitthāti.

‘‘Vipassissa bhagavato, aggisālaṃ adāsahaṃ;

Byādhikānañca āvāsaṃ, uṇhodakapaṭiggahaṃ.

‘‘Tena kammenayaṃ mayhaṃ, attabhāvo sunimmito;

Byādhāhaṃ nābhijānāmi, puññakammassidaṃ phalaṃ.

‘‘Ekanavutito kappe, yaṃ sālamadadiṃ tadā;

Duggatiṃ nābhijānāmi, aggisālāyidaṃ phalaṃ.

‘‘Ito ca sattame kappe, ekosiṃ aparājito ;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā abyādhiko thero imā gāthāyo abhāsitthāti.

‘‘Nārado iti me nāmaṃ, kassapo iti maṃ vidū;

Addasaṃ samaṇānaggaṃ, vipassiṃ devasakkataṃ.

‘‘Anubyañjanadharaṃ buddhaṃ, āhutīnaṃ paṭiggahaṃ;

Aṅkolapupphaṃ paggayha, buddhassa abhiropayiṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Catusattatito kappe, romaso nāma khattiyo;

Āmukkamālābharaṇo, sayoggabalavāhano.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aṅkolapupphiyo thero imā gāthāyo abhāsitthāti.

‘‘Uyyānabhūmiṃ niyyanto, addasaṃ lokanāyakaṃ;

Vaṭaṃsakaṃ gahetvāna, sovaṇṇaṃ sādhunimmitaṃ.

‘‘Sīghaṃ tato samāruyha, hatthikkhandhagato ahaṃ;

Buddhassa abhiropesiṃ, sikhino lokabandhuno.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

‘‘Sattavīse ito kappe, eko āsiṃ janādhipo;

Mahāpatāpanāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sovaṇṇavaṭaṃsakiyo thero imā gāthāyo abhāsitthāti.

‘‘Nibbute lokanāthamhi, sikhimhi vadataṃ vare;

Vaṭaṃsakehi ākiṇṇaṃ, bodhipūjaṃ akāsahaṃ.

‘‘Ekattiṃse ito kappe, yaṃ pūjamakariṃ tadā;

Duggatiṃ nābhijānāmi, bodhipūjāyidaṃ phalaṃ.

‘‘Ito chabbīsatikappe, ahuṃ meghabbhanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā miñjavaṭaṃsakiyo thero imā gāthāyo abhāsitthāti.

‘‘Asito nāma nāmena, mālākāro ahaṃ tadā;

Āveḷaṃ paggahetvāna, rañño dātuṃ vajāmahaṃ.

‘‘Asampattomhi rājānaṃ, addasaṃ sikhināyakaṃ;

Haṭṭho haṭṭhena cittena, buddhassa abhiropayiṃ.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Pañcavīse ito kappe, rājāhosiṃ mahabbalo;

Vebhāro nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sukatāveḷiyo thero imā gāthāyo abhāsitthāti.

‘‘Usabhaṃ pavaraṃ vīraṃ, vessabhuṃ vijitāvinaṃ;

Pasannacitto sumano, buddhaseṭṭhamavandahaṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, vandanāya idaṃ phalaṃ.

‘‘Catuvīsatikappamhi, vikatānandanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekavandaniyo thero imā gāthāyo abhāsitthāti.