22. Hatthivaggo

‘‘Siddhatthassa bhagavato, dvipadindassa tādino;

Nāgaseṭṭho mayā dinno, īsādanto urūḷhavā.

‘‘Uttamatthaṃ anubhomi, santipadamanuttaraṃ;

Nāgadānaṃ mayā dinnaṃ, sabbalokahitesino.

‘‘Catunnavutito kappe, yaṃ nāga madadiṃ tadā;

Duggatiṃ nābhijānāmi, nāgadānassidaṃ phalaṃ.

‘‘Aṭṭhasattatikappamhi, soḷasāsiṃsu khattiyā;

Samantapāsādikā nāma, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā hatthidāyako thero imā gāthāyo abhāsitthāti.

‘‘Āraññikassa isino, cirarattatapassino ;

Buddhassa bhāvitattassa, adāsiṃ pānadhiṃ ahaṃ.

‘‘Tena kammena dvipadinda, lokajeṭṭha narāsabha;

Dibbayānaṃ anubhomi, pubbakammassidaṃ phalaṃ.

‘‘Catunnavute ito kappe, yaṃ kammamakariṃ tadā;

Duggatiṃ nābhijānāmi, pānadhissa idaṃ phalaṃ.

‘‘Sattasattatito kappe, aṭṭha āsiṃsu khattiyā;

Suyānā nāma nāmena, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pānadhidāyako thero imā gāthāyo abhāsitthāti.

‘‘Vessabhū tamhi samaye, bhikkhusaṅghapurakkhato;

Deseti ariyasaccāni, nibbāpento mahājanaṃ.

‘‘Paramakāruññapattomhi, samitiṃ agamāsahaṃ;

Sohaṃ nisinnako santo, dhammamassosi satthuno.

‘‘Tassāhaṃ dhammaṃ sutvāna, devalokaṃ agacchahaṃ;

Tiṃsakappāni devesu, avasiṃ tatthahaṃ pure.

‘‘Ekattiṃse ito kappe, yaṃ saññamalabhiṃ tadā;

Duggatiṃ nābhijānāmi, saccasaññāyidaṃ phalaṃ.

‘‘Chabbīsamhi ito kappe, eko āsiṃ janādhipo;

Ekaphusitanāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saccasaññako thero imā gāthāyo abhāsitthāti.

‘‘Dumagge paṃsukūlikaṃ , laggaṃ disvāna satthuno;

Añjaliṃ paggahetvāna, paṃsukūlaṃ avandahaṃ.

‘‘Ekattiṃse ito kappe, yaṃ saññamalabhiṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Pañcavīse ito kappe, eko āsiṃ janādhipo;

Amitābhoti nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekasaññako thero imā gāthāyo abhāsitthāti.

‘‘Udentaṃ sataraṃsiṃva, pītaraṃsiṃva bhāṇumaṃ;

Byagghūsabhaṃva pavaraṃ, sujātaṃ pabbatantare.

‘‘Buddhassa ānubhāvo so, jalate pabbatantare;

Raṃse cittaṃ pasādetvā, kappaṃ saggamhi modahaṃ.

‘‘Avasesesu kappesu, kusalaṃ caritaṃ mayā;

Tena cittappasādena, buddhānussatiyāpi ca.

‘‘Tiṃsakappasahasseto, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

‘‘Sattapaññāsakappamhi, eko āsiṃ janādhipo;

Sujāto nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā raṃsisaññako thero imā gāthāyo abhāsitthāti.

‘‘Assatthe haritobhāse, saṃvirūḷhamhi pādape;

Ekaṃ buddhagataṃ saññaṃ, alabhiṃhaṃ patissato.

‘‘Ekattiṃse ito kappe, yaṃ saññamalabhiṃ tadā;

Tassā saññāya vāhasā, patto me āsavakkhayo.

‘‘Ito terasakappamhi, dhaniṭṭho nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sandhito thero imā gāthāyo abhāsitthāti.

‘‘Tālavaṇṭaṃ mayā dinnaṃ, tissassādiccabandhuno;

Gimhanibbāpanatthāya, pariḷāhopasantiyā.

‘‘Sannibbāpemi rāgaggiṃ, dosaggiñca taduttariṃ;

Nibbāpemi ca mohaggiṃ, tālavaṇṭassidaṃ phalaṃ.

‘‘Kilesā jhāpitā mayhaṃ, bhavā sabbe samūhatā;

Dhāremi antimaṃ dehaṃ, sammāsambuddhasāsane.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, tālavaṇṭassidaṃ phalaṃ.

‘‘Tesaṭṭhimhi ito kappe, mahānāmasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tālavaṇṭadāyako thero imā gāthāyo abhāsitthāti.

‘‘Kusāṭakaṃ gahetvāna, upajjhāyassahaṃ pure;

Mantañca anusikkhāmi, ganthādosassa pattiyā.

‘‘Addasaṃ virajaṃ buddhaṃ, āhutīnaṃ paṭiggahaṃ;

Usabhaṃ pavaraṃ aggaṃ, tissaṃ buddhaṃ gaṇuttamaṃ .

‘‘Kusāṭakaṃ pattharitaṃ, akkamantaṃ naruttamaṃ;

Samuggataṃ mahāvīraṃ, lokajeṭṭhaṃ narāsabhaṃ.

‘‘Disvā taṃ lokapajjotaṃ, vimalaṃ candasannibhaṃ;

Avandiṃ satthuno pāde, vippasannena cetasā.

‘‘Catunnavutito kappe, yaṃ adāsiṃ kusāṭakaṃ;

Duggatiṃ nābhijānāmi, kusāṭakassidaṃ phalaṃ.

‘‘Sattatiṃse ito kappe, eko āsiṃ janādhipo;

Sunando nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā akkantasaññako thero imā gāthāyo abhāsitthāti;

‘‘Nisinno pāsādavare, nārīgaṇapurakkhato;

Byādhitaṃ samaṇaṃ disvā, abhināmesahaṃ gharaṃ.

‘‘Upaviṭṭhaṃ mahāvīraṃ, devadevaṃ narāsabhaṃ;

Sappitelaṃ mayā dinnaṃ, siddhatthassa mahesino.

‘‘Passaddhadarathaṃ disvā, vippasannamukhindriyaṃ;

Vanditvā satthuno pāde, anusaṃsāvayiṃ pure.

‘‘Disvā maṃ suppasannattaṃ , iddhiyā pāramiṅgato;

Nabhaṃ abbhuggamī dhīro, haṃsarājāva ambare.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, sappitelassidaṃ phalaṃ.

‘‘Ito sattarase kappe, jutideva sanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sappidāyako thero imā gāthāyo abhāsitthāti.

‘‘Piyadassissa bhagavato, caṅkamaṃ sodhitaṃ mayā;

Naḷakehi paṭicchannaṃ, vātātapanivāraṇaṃ.

‘‘Pāpaṃ vivajjanatthāya, kusalassupasampadā;

Kilesānaṃ pahānāya, padahiṃ satthu sāsane.

‘‘Ito ekādase kappe, aggidevoti vissuto;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pāpanivāriyo thero imā gāthāyo abhāsitthāti.