35. Ekapadumiyavaggo

‘‘Padumuttaro nāma jino, sabbadhammāna pāragū;

Bhavābhave vibhāvento, tāresi janataṃ bahuṃ.

‘‘Haṃsarājā tadā homi, dijānaṃ pavaro ahaṃ;

Jātassaraṃ samogayha, kīḷāmi haṃsakīḷitaṃ.

‘‘Padumuttaro lokavidū, āhutīnaṃ paṭiggaho;

Jātassarassa upari, āgacchi tāvade jino.

‘‘Disvānahaṃ devadevaṃ, sayambhuṃ lokanāyakaṃ;

Vaṇṭe chetvāna padumaṃ, satapattaṃ manoramaṃ.

‘‘Mukhatuṇḍena paggayha, pasanno lokanāyake ;

Ukkhipitvāna gagaṇe , buddhaseṭṭhaṃ apūjayiṃ.

‘‘Padumuttaro lokavidū, āhutīnaṃ paṭiggaho;

Antalikkhe ṭhito satthā, akā me anumodanaṃ.

‘‘‘Iminā ekapadumena, cetanāpaṇidhīhi ca;

Kappānaṃ satasahassaṃ, vinipātaṃ na gacchasi’.

‘‘Idaṃ vatvāna sambuddho, jalajuttamanāmako;

Mama kammaṃ pakittetvā, agamā yena patthitaṃ.

‘‘Satasahassito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ekapadumiyo thero imā gāthāyo abhāsitthāti.

‘‘Candabhāgānadītīre, ahosiṃ vānaro tadā;

Addasaṃ virajaṃ buddhaṃ, nisinnaṃ pabbatantare.

‘‘Obhāsentaṃ disā sabbā, sālarājaṃva phullitaṃ;

Lakkhaṇabyañjanūpetaṃ, disvā attamano ahuṃ.

‘‘Udaggacitto sumano, pītiyā haṭṭhamānaso;

Tīṇi uppalapupphāni, matthake abhiropayiṃ.

‘‘Pupphāni abhiropetvā, vipassissa mahesino;

Sagāravo bhavitvāna , pakkāmiṃ uttarāmukho.

‘‘Gacchanto paṭikuṭiko, vippasannena cetasā;

Selantare patitvāna , pāpuṇiṃ jīvitakkhayaṃ.

‘‘Tena kammena sukatena, cetanāpaṇidhīhi ca;

Jahitvā mānusaṃ dehaṃ , tāvatiṃsamagacchahaṃ.

‘‘Satānaṃ tīṇikkhattuñca, devarajjaṃ akārayiṃ;

Satānaṃ pañcakkhattuñca, cakkavattī ahosahaṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tīṇuppalamāliyo thero imā gāthāyo abhāsitthāti.

‘‘Tisso nāma ahu satthā, lokajeṭṭho narāsabho;

Tayopadhikkhaye disvā, dhajaṃ āropitaṃ mayā.

‘‘Tena kammena sukatena, cetanāpaṇidhīhi ca;

Jahitvā mānusaṃ dehaṃ, tāvatiṃsamagacchahaṃ.

‘‘Satānaṃ tīṇikkhattuñca, devarajjaṃ akārayiṃ;

Satānaṃ pañcakkhattuñca, cakkavattī ahosahaṃ.

‘‘Padesarajjaṃ vipulaṃ, gaṇanāto asaṅkhiyaṃ;

Anubhomi sakaṃ kammaṃ, pubbe sukatamattano.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, dhajadānassidaṃ phalaṃ.

‘‘Icchamāno cahaṃ ajja, sakānanaṃ sapabbataṃ;

Khomadussena chādeyyaṃ, tadā mayhaṃ kate phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhajadāyako thero imā gāthāyo abhāsitthāti.

‘‘Himavantassāvidūre, bhūtagaṇo nāma pabbato;

Tatthaddasaṃ paṃsukūlaṃ, dumaggamhi vilaggitaṃ.

‘‘Tīṇi kiṅkaṇipupphāni, ocinitvānahaṃ tadā;

Haṭṭho haṭṭhena cittena, paṃsukūlaṃ apūjayiṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, tiṇṇaṃ pupphānidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tikiṅkaṇipūjako thero imā gāthāyo abhāsitthāti.

‘‘Himavantassāvidūre, hārito nāma pabbato;

Sayambhū nārado nāma, rukkhamūle vasī tadā.

‘‘Naḷāgāraṃ karitvāna, tiṇena chādayiṃ ahaṃ;

Caṅkamaṃ sodhayitvāna, sayambhussa adāsahaṃ.

‘‘Catuddasasu kappesu, devaloke ramiṃ ahaṃ;

Catusattatikkhattuñca, devarajjaṃ akārayiṃ.

‘‘Catusattati kkhattuñca, cakkavattī ahosahaṃ;

Padesarajjaṃ vipulaṃ, gaṇanāto asaṅkhiyaṃ.

‘‘Ubbiddhaṃ bhavanaṃ mayhaṃ, indalaṭṭhīva uggataṃ;

Sahassathambhaṃ atulaṃ, vimānaṃ sapabhassaraṃ.

‘‘Dve sampattī anubhotvā, sukkamūlena codito;

Gotamassa bhagavato, sāsane pabbajiṃ ahaṃ.

‘‘Padhānapahitattomhi, upasanto nirūpadhi;

Nāgova bandhanaṃ chetvā, viharāmi anāsavo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā naḷāgāriko thero imā gāthāyo abhāsitthāti.

‘‘Himavantassāvidūre, jāpalo nāma pabbato;

Buddho sudassano nāma, vihāsi pabbatantare.

‘‘Pupphaṃ hemavantaṃ gayha, gacchaṃ vehāyasenahaṃ;

Addasaṃ virajaṃ buddhaṃ, oghatiṇṇamanāsavaṃ.

‘‘Satta campakapupphāni, sīse katvānahaṃ tadā;

Buddhassa abhiropesiṃ, sayambhussa mahesino.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā campakapupphiyo thero imā gāthāyo abhāsitthāti.

‘‘Himavantassāvidūre, romaso nāma pabbato;

Buddhopi sambhavo nāma, abbhokāse vasī tadā.

‘‘Bhavanā nikkhamitvāna, padumaṃ dhārayiṃ ahaṃ;

Ekāhaṃ dhārayitvāna, puna bhavanupāgamiṃ.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumapūjako thero imā gāthāyo abhāsitthāti.

‘‘Himavantassāvidūre, lambako nāma pabbato;

Upatisso nāma sambuddho, abbhokāsamhi caṅkami.

‘‘Migaluddo tadā āsiṃ, araññe kānane ahaṃ;

Disvāna taṃ devadevaṃ, sayambhuṃ aparājitaṃ.

‘‘Vippasannena cittena, tadā tassa mahesino;

Nisīdanatthaṃ buddhassa, tiṇamuṭṭhimadāsahaṃ.

‘‘Datvāna devadevassa, bhiyyo cittaṃ pasādayiṃ;

Sambuddhaṃ abhivādetvā, pakkāmiṃ uttarāmukho.

‘‘Aciraṃ gatamattaṃ maṃ, migarājā apothayi ;

Sīhena pothito santo, tattha kālaṅkato ahaṃ.

‘‘Āsanne me kataṃ kammaṃ, buddhaseṭṭhe anāsave;

Sumutto saravegova, devalokaṃ agañchahaṃ.

‘‘Yūpo tattha subho āsi, puññakammābhinimmito;

Sahassakaṇḍo satabheṇḍu, dhajālu haritāmayo.

‘‘Pabhā niddhāvate tassa, sataraṃsīva uggato;

Ākiṇṇo devakaññāhi, āmodiṃ kāmakāmahaṃ.

‘‘Devalokā cavitvāna, sukkamūlena codito;

Āgantvāna manussattaṃ, pattomhi āsavakkhayaṃ.

‘‘Catunnavutito kappe, nisīdanamadāsahaṃ;

Duggatiṃ nābhijānāmi, tiṇamuṭṭhiyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tiṇamuṭṭhidāyako thero imā gāthāyo abhāsitthāti.

‘‘Kaṇikāraṃva jotantaṃ, nisinnaṃ pabbatantare;

Addasaṃ virajaṃ buddhaṃ, oghatiṇṇamanāsavaṃ.

‘‘Tindukaṃ saphalaṃ disvā, bhinditvāna sakosakaṃ ;

Pasannacitto sumano, sayambhussa madāsahaṃ .

‘‘Ekanavutito kappe, yaṃ phalamadadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tindukaphaladāyako thero imā gāthāyo abhāsitthāti.

‘‘Romaso nāma sambuddho, nadīkūle vasī tadā;

Addasaṃ virajaṃ buddhaṃ, pītaraṃsiṃva bhāṇumaṃ.

‘‘Ukkāmukhapahaṭṭhaṃva, khadiraṅgārasannibhaṃ;

Osadhiṃva virocantaṃ, ekañjalimakāsahaṃ.

‘‘Catunnavutito kappe, yaṃ añjalimakāsahaṃ;

Duggatiṃ nābhijānāmi, añjaliyā idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekañjaliyo thero imā gāthāyo abhāsitthāti.