31. Padumakesaravaggo

‘‘Isisaṅghe ahaṃ pubbe, āsiṃ mātaṅgavāraṇo;

Mahesīnaṃ pasādena, padmakesaramokiriṃ.

‘‘Paccekajinaseṭṭhesu, dhutarāgesu tādisu;

Tesu cittaṃ pasādetvā, kappaṃ saggamhi modahaṃ.

‘‘Ekanavutito kappe, kesaraṃ okiriṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā padumakesariyo thero imā gāthāyo abhāsitthāti.

‘‘Gandhamālaṃ mayā dinnaṃ, vipassissa mahesino;

Adāsiṃ ujubhūtassa, koseyyavatthamuttamaṃ.

‘‘Ekanavutito kappe, yaṃ vatthamadadiṃ pure;

Duggatiṃ nābhijānāmi, gandhadānassidaṃ phalaṃ.

‘‘Ito pannarase kappe, suceḷo nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sabbagandhiyo thero imā gāthāyo abhāsitthāti.

‘‘Kaṇikāraṃva jotantaṃ, udayantaṃva bhāṇumaṃ;

Vipassiṃ addasaṃ buddhaṃ, lokajeṭṭhaṃ narāsabhaṃ.

‘‘Añjaliṃ paggahetvāna, abhinesiṃ sakaṃ gharaṃ;

Abhinetvāna sambuddhaṃ, paramannamadāsahaṃ.

‘‘Ekanavutito kappe, paramannamadiṃ tadā;

Duggatiṃ nābhijānāmi, paramannassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paramannadāyako thero imā gāthāyo abhāsitthāti.

‘‘Vipassino bhagavato, mahābodhimaho ahu;

Rukkhaṭṭhasseva sambuddho, lokajeṭṭho narāsabho .

‘‘Bhagavā tamhi samaye, bhikkhusaṅghapurakkhato;

Catusaccaṃ pakāseti, vācāsabhimudīrayaṃ.

‘‘Saṅkhittena ca desento, vitthārena ca desayaṃ ;

Vivaṭṭacchado sambuddho, nibbāpesi mahājanaṃ.

‘‘Tassāhaṃ dhammaṃ sutvāna, lokajeṭṭhassa tādino;

Vanditvā satthuno pāde, pakkāmiṃ uttarāmukho.

‘‘Ekanavutito kappe, yaṃ dhammamasuṇiṃ tadā;

Duggatiṃ nābhijānāmi, dhammasavassidaṃ phalaṃ.

‘‘Tettiṃsamhi ito kappe, eko āsiṃ mahīpati;

Sutavā nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhammasaññako thero imā gāthāyo abhāsitthāti.

‘‘Bhāgīrathīnadītīre, ahosi assamo tadā;

Tamahaṃ assamaṃ gacchiṃ, phalahattho apekkhavā.

‘‘Vipassiṃ tattha addakkhiṃ, pītaraṃsiṃva bhāṇumaṃ;

Yaṃ me atthi phalaṃ sabbaṃ, adāsiṃ satthuno ahaṃ.

‘‘Ekanavutito kappe, yaṃ phalaṃ adadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā phaladāyako thero imā gāthāyo abhāsitthāti.

‘‘‘Namo te buddha vīratthu, vippamuttosi sabbadhi;

Byasanamhi anuppatto, tassa me saraṇaṃ bhava’.

‘‘Siddhattho tassa byākāsi, loke appaṭipuggalo;

‘Mahodadhisamo saṅgho, appameyyo anuttaro.

‘‘‘Tattha tvaṃ viraje khette, anantaphaladāyake;

Saṅghe cittaṃ pasādetvā, subījaṃ vāpa ropaya.

‘‘Idaṃ vatvāna sabbaññū, lokajeṭṭho narāsabho;

Mameva anusāsitvā, vehāsaṃ nabhamuggami.

‘‘Aciraṃ gatamattamhi, sabbaññumhi narāsabhe;

Maraṇaṃ samanuppatto, tusitaṃ upapajjahaṃ.

‘‘Tadāhaṃ viraje khette, anantaphaladāyake;

Saṅghe cittaṃ pasādetvā, kappaṃ saggamhi modahaṃ.

‘‘Catunnavutito kappe, pasādamalabhiṃ tadā;

Duggatiṃ nābhijānāmi, pasādassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sampasādako thero imā gāthāyo abhāsitthāti.

‘‘Siddhatthassa bhagavato, ārāmo ropito mayā;

Sandacchāyesu rukkhesu, upāsantesu pakkhisu.

‘‘Addasaṃ virajaṃ buddhaṃ, āhutīnaṃ paṭiggahaṃ;

Ārāmaṃ abhināmesiṃ, lokajeṭṭhaṃ narāsabhaṃ.

‘‘Haṭṭho haṭṭhena cittena, phalaṃ pupphamadāsahaṃ;

Tato jātappasādova, taṃ vanaṃ pariṇāmayiṃ.

‘‘Buddhassa yamidaṃ dāsiṃ, vippasannena cetasā;

Bhave nibbattamānamhi, nibbattati phalaṃ mama.

‘‘Catunnavutito kappe, yaṃ ārāmamadaṃ tadā;

Duggatiṃ nābhijānāmi, ārāmassa idaṃ phalaṃ.

‘‘Sattatiṃse ito kappe, sattāsuṃ mudusītalā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ārāmadāyako thero imā gāthāyo abhāsitthāti.

‘‘Atthadassissa munino, addasaṃ sāvakaṃ ahaṃ;

Navakammaṃ karontassa, sīmāya upagacchahaṃ.

‘‘Niṭṭhite navakamme ca, anulepamadāsahaṃ;

Pasannacitto sumano, puññakkhette anuttare.

‘‘Aṭṭhārase kappasate, yaṃ kammamakariṃ tadā;

Duggatiṃ nābhijānāmi, anulepassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā anulepadāyako thero imā gāthāyo abhāsitthāti.

‘‘Udentaṃ sataraṃsiṃva, pītaraṃsiṃva bhāṇumaṃ;

Vanantaragataṃ santaṃ, lokajeṭṭhaṃ narāsabhaṃ.

‘‘Addasaṃ supinantena, siddhatthaṃ lokanāyakaṃ;

Tattha cittaṃ pasādetvā, sugatiṃ upapajjahaṃ.

‘‘Catunnavutito kappe, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhasaññako thero imā gāthāyo abhāsitthāti.

‘‘Piyadassino bhagavato, pabbhāro sodhito mayā;

Ghaṭakañca upaṭṭhāsiṃ, paribhogāya tādino.

‘‘Taṃ me buddho viyākāsi, piyadassī mahāmuni;

Sahassakaṇḍo satabheṇḍu , dhajālu haritāmayo.

‘‘Nibbattissati so yūpo, ratanañca anappakaṃ;

Pabbhāradānaṃ datvāna, kappaṃ saggamhi modahaṃ.

‘‘Ito bāttiṃsakappamhi, susuddho nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pabbhāradāyako thero imā gāthāyo abhāsitthāti.