30. Citakapūjakavaggo

‘‘Ajito nāma nāmena, ahosiṃ brāhmaṇo tadā;

Āhutiṃ yiṭṭhukāmohaṃ, nānāpupphaṃ samānayiṃ.

‘‘Jalantaṃ citakaṃ disvā, sikhino lokabandhuno;

Tañca pupphaṃ samānetvā, citake okiriṃ ahaṃ.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Sattavīse ito kappe, sattāsuṃ manujādhipā;

Supajjalitanāmā te, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā citakapūjako thero imā gāthāyo abhāsitthāti.

‘‘Vākacīradharo āsiṃ, ajinuttaravāsano;

Abhiññā pañca nibbattā, candassa parimajjako.

‘‘Vipassiṃ lokapajjotaṃ, disvā abhigataṃ mamaṃ;

Pāricchattakapupphāni, dhāresiṃ satthuno ahaṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, dhāraṇāya idaṃ phalaṃ.

‘‘Sattāsītimhito kappe, eko āsiṃ mahīpati;

Samantadhāraṇo nāma, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pupphadhārako thero imā gāthāyo abhāsitthāti.

‘‘Putto mama pabbajito, kāsāyavasano tadā;

So ca buddhattaṃ sampatto, nibbuto lokapūjito.

‘‘Vicinanto sakaṃ puttaṃ, agamaṃ pacchato ahaṃ;

Nibbutassa mahantassa, citakaṃ agamāsahaṃ.

‘‘Paggayha añjaliṃ tattha, vanditvā citakaṃ ahaṃ;

Setacchattañca paggayha, āropesiṃ ahaṃ tadā.

‘‘Catunnavutito kappe, yaṃ chattamabhiropayiṃ;

Duggatiṃ nābhijānāmi, chattadānassidaṃ phalaṃ.

‘‘Pañcavīse ito kappe, satta āsuṃ janādhipā;

Mahārahasanāmā te, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā chattadāyako thero imā gāthāyo abhāsitthāti.

‘‘Anuggatamhi ādicce, panādo vipulo ahu;

Buddhaseṭṭhassa lokamhi, pātubhāvo mahesino.

‘‘Ghosa massosahaṃ tattha, na ca passāmi taṃ jinaṃ;

Maraṇañca anuppatto, buddhasaññamanussariṃ.

‘‘Catunnavutito kappe, yaṃ saññamalabhiṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saddasaññako thero imā gāthāyo abhāsitthāti.

‘‘Ārāmadvārā nikkhamma, gosīsaṃ santhataṃ mayā;

Anubhomi sakaṃ kammaṃ, pubbakammassidaṃ phalaṃ.

‘‘Ājāniyā vātajavā, sindhavā sīghavāhanā;

Anubhomi sabbametaṃ, gosīsassa idaṃ phalaṃ.

‘‘Aho kāraṃ paramakāraṃ, sukhatte sukataṃ mayā;

Saṅghe katassa kārassa, na aññaṃ kalamagghati.

‘‘Catunnavutito kappe, yaṃ sīsaṃ santhariṃ ahaṃ;

Duggatiṃ nābhijānāmi, santharassa idaṃ phalaṃ.

‘‘Pañcasattatikappamhi, suppatiṭṭhitanāmako;

Eko āsiṃ mahātejo, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā gosīsanikkhepako thero imā gāthāyo abhāsitthāti.

‘‘Pabbate himavantamhi, ahosiṃ kinnaro tadā;

Addasaṃ virajaṃ buddhaṃ, pītaraṃsiṃva bhāṇumaṃ.

‘‘Upetaṃ tamahaṃ buddhaṃ, vipassiṃ lokanāyakaṃ;

Candanaṃ tagarañcāpi, pāde osiñcahaṃ tadā.

‘‘Ekanavutito kappe, yaṃ pādaṃ abhipūjayiṃ;

Duggatiṃ nābhijānāmi, pādapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pādapūjako thero imā gāthāyo abhāsitthāti.

‘‘Upasālakanāmohaṃ, ahosiṃ brāhmaṇo tadā;

Kānanaṃ vanamogāḷhaṃ, lokajeṭṭhaṃ narāsabhaṃ.

‘‘Disvāna vandiṃ pādesu, lokāhutipaṭiggahaṃ;

Pasannacittaṃ maṃ ñatvā, buddho antaradhāyatha.

‘‘Kānanā abhinikkhamma, buddhaseṭṭhamanussariṃ;

Taṃ desaṃ kittayitvāna, kappaṃ saggamhi modahaṃ.

‘‘Dvenavute ito kappe, yaṃ desamabhikittayiṃ;

Duggatiṃ nābhijānāmi, kittanāya idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā desakittako thero imā gāthāyo abhāsitthāti.

‘‘Pabbate himavantamhi, ahosiṃ luddako tadā;

Vipassiṃ addasaṃ buddhaṃ, lokajeṭṭhaṃ narāsabhaṃ.

‘‘Upāsitvāna sambuddhaṃ, veyyāvaccamakāsahaṃ;

Saraṇañca upāgacchiṃ, dvipadindassa tādino.

‘‘Ekanavutito kappe, saraṇaṃ upagacchahaṃ;

Duggatiṃ nābhijānāmi, saraṇāgamanapphalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saraṇagamaniyo thero imā gāthāyo abhāsitthāti.

‘‘Romaso nāma nāmena, dānavo iti vissuto;

Ambapiṇḍī mayā dinnā , vipassissa mahesino.

‘‘Ekanavutito kappe, yamambamadadiṃ tadā;

Duggatiṃ nābhijānāmi, ambadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ambapiṇḍiyo thero imā gāthāyo abhāsitthāti.

‘‘Piṇḍāya caramānāhaṃ, vipassimaddasaṃ jinaṃ;

Uḷuṅgabhikkhaṃ pādāsiṃ, dvipadindassa tādino.

‘‘Pasannacitto sumano, abhivādesahaṃ tadā;

Anusaṃsāvayiṃ buddhaṃ, uttamatthassa pattiyā.

‘‘Ekanavutito kappe, anusaṃsāvayiṃ ahaṃ;

Duggatiṃ nābhijānāmi, anusaṃsāvanā phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā anusaṃsāvako thero imā gāthāyo abhāsitthāti.

Tassuddānaṃ –

Citakaṃ pārichatto ca, saddagosīsasantharaṃ;

Pādo padesaṃ saraṇaṃ, ambo saṃsāvakopi ca;

Aṭṭhatālīsa gāthāyo, gaṇitāyo vibhāvibhi.

Atha vagguddānaṃ –

Kaṇikāro hatthidado, ālambaṇudakāsanaṃ;

Tuvaraṃ thomako ceva, ukkhepaṃ sīsupadhānaṃ.

Paṇṇado citapūjī ca, gāthāyo ceva sabbaso;

Cattāri ca satānīha, ekapaññāsameva ca.

Pañcavīsasatā sabbā, dvāsattati taduttari;

Tisataṃ apadānānaṃ, gaṇitā atthadassibhi.