25. Tuvaradāyakavaggo

‘‘Migaluddo pure āsiṃ, araññe kānane ahaṃ;

Bharitvā tuvaramādāya , saṅghassa adadiṃ ahaṃ.

‘‘Ekanavutito kappe, yaṃ dānamadadiṃ tadā;

Duggatiṃ nābhijānāmi, tuvarassa idaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā tuvaradāyako thero imā gāthāyo abhāsitthāti.

‘‘Dhanuṃ advejjhaṃ katvāna, vanamajjhogahiṃ ahaṃ;

Kesaraṃ ogataṃ disvā, patapattaṃ samuṭṭhitaṃ.

‘‘Ubho hatthehi paggayha, sire katvāna añjaliṃ;

Buddhassa abhiropesiṃ, tissassa lokabandhuno.

‘‘Dvenavute ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Tesattatimhi kappamhi , satta kesaranāmakā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā nāgakesariyo thero imā gāthāyo abhāsitthāti.

‘‘Jātassarassa vemajjhe, vasāmi jalakukkuṭo;

Addasāhaṃ devadevaṃ, gacchantaṃ anilañjase.

‘‘Tuṇḍena kesariṃ gayha, vippasannena cetasā;

Buddhassa abhiropesiṃ, tissassa lokabandhuno.

‘‘Dvenavute ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Tesattatimhi kappamhi, satta kesaranāmakā ;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā naḷinakesariyo thero imā gāthāyo abhāsitthāti.

‘‘Khīṇāsavasahassehi, niyyāti lokanāyako;

Viravapupphamādāya , buddhassa abhiropayiṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā viravapupphiyo thero imā gāthāyo abhāsitthāti.

‘‘Siddhatthassa bhagavato, ahosiṃ kuṭigopako;

Kālena kālaṃ dhūpesiṃ, pasanno sehi pāṇibhi.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, dhūpadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kuṭidhūpako thero imā gāthāyo abhāsitthāti.

‘‘Paramena damathena, siddhatthassa mahesino;

Pattadānaṃ mayā dinnaṃ, ujubhūtassa tādino.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, pattadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pattadāyako thero imā gāthāyo abhāsitthāti.

‘‘Nibbute lokanāthamhi, siddhatthamhi naruttame;

Ekā dhātu mayā laddhā, dvipadindassa tādino.

‘‘Tāhaṃ dhātuṃ gahetvāna, buddhassādiccabandhuno;

Pañcavasse paricariṃ, tiṭṭhantaṃva naruttamaṃ.

‘‘Catunnavutito kappe, yaṃ dhātuṃ pūjayiṃ tadā;

Duggatiṃ nābhijānāmi, dhātupaṭṭhahane phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhātupūjako thero imā gāthāyo abhāsitthāti.

‘‘Satta sattalipupphāni, sīse katvānahaṃ tadā;

Buddhassa abhiropesiṃ, vessabhumhi naruttame .

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sattalipupphapūjako thero imā gāthāyo abhāsitthāti.

‘‘Padumuttaro nāma jino, sayambhū aggapuggalo;

Catusaccaṃ pakāseti, dīpeti amataṃ padaṃ.

‘‘Bimbijālakapupphāni , puthu katvānahaṃ tadā;

Buddhassa abhiropesiṃ, dvipadindassa tādino.

‘‘Aṭṭhasaṭṭhimhito kappe, caturo kiñjakesarā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bimbijāliyo thero imā gāthāyo abhāsitthāti.

‘‘Kakudho nāma nāmena, sayambhū aparājito;

Pavanā nikkhamitvāna, anuppatto mahānadiṃ.

‘‘Uddālakaṃ gahetvāna, sayambhussa adāsahaṃ;

Saṃyatassujubhūtassa, pasannamānaso ahaṃ.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, pupphadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā uddālakadāyako thero imā gāthāyo abhāsitthāti.